A recente abdicación do Xefe do Estado e a posta en marcha dos mecanismos institucionais previstos para a Sucesión á Coroa teñen aberto un intenso debate social, institucional e cívico sobre a continuidade ou non da Monarquía Parlamentaria e sobre a necesidade de que a cidadanía defina, de novo, a Forma de Estado para as próximas décadas.
É certo que estamos ante un Pleno Municipal e que o modelo de convivencia no Estado e a Xefatura do mesmo son asuntos tratados noutros ámbitos institucionais, pero non o é menos que o Salón de Plenos municipal é a casa de todos os cidadáns e cidadás e que o momento, a transcendencia do mesmo e o camiño a seguir no futuro esixen manifestar, con responsabilidade e claridade a nosa opinión.
Por todo o exposto o
PSdeG-PSOE de Narón, somete para o seu debate e a súa aprobación se procede, a adopción dos seguintes
ACORDOS:
1- O Pleno Municipal acorda enviar ás Cortes Xerais e ao conxunto das forzas políticas parlamentarias a proposta de iniciar un proceso de REFORMA CONSTITUCIONAL, no marco das previsións do propio texto, que alcance á arquitectura institucional, os acordos territoriais e a blindaxe dos dereitos sociais.
2- A REFORMA e o consenso constitucional deben alcanzar, así mesmo, á Forma de Estado recollido no Artigo Primeiro do actual texto Constitucional.
3- Tal e como está previsto, o proceso de acordo debe ser referendado polos cidadáns e cidadás nun REFERENDO.
