Os socialistas naroneses presentaron unha moción no rexistro municipal na que instan ao pleno a efectuar as reducións salariais ós alcaldes, concelleiros e altos cargos dos gobernos locais propostas pola Federación Española de Municipios e Provincias para contribuír á redución do déficit público. A FEMP aposta por aplicar os descontos utilizando os mesmos criterios e escalas establecidos polo Goberno central para a administración xeral do Estado, que se establecerán de xeito individual e con criterios de progresividade, tomando como base para o seu cálculo as contías da retribución percibida.
Así mesmo, a portavoz do PSOE de Narón, Catalina García, presentou outra moción na que se insta á Xunta a primar o investimento social nos mesmos termos, cando menos, do anterior goberno bipartito. No documento, tamén se solicita á administración autonómica que active políticas públicas sociais, evitando a privatización dos servizos públicos e que desenvolva unha política de colaboración institucional cos concellos que permitan desenvolver correctamente as políticas sociais municipais. Os socialistas requiren tamén que se reconduza a “nefasta xestión da Xunta en políticas sociais, reactivando o Plan Concertado, as Políticas de Dependencia e os programas de colaboración cos municipios”.
As dúas mocións trataranse na Xunta de Portavoces convocada para mañá e, posteriormente, no pleno do día 29.
